Hræsni? Neeeeiiii.....Amen

Jæja þá er maður bara lagstur í Biblíurannsóknir. Það er nú orðið nokkuð langt um liðið síðan ég gerði það síðast. Það eina sem ég mundi almennilega er það sem oft hefur verið vitnað í: "Eigi skalt þú leggjast með karlmanni sem kona væri. Það er viðurstyggð" (3M 18.22). Þetta stendur svart á hvítu í Biblíunni og því ekki um annað að ræða en hafa það í heiðri. "Engan mör úr nautum, sauðum eða geitum megið þér eta"(3M 7.23). "Eigi skuluð þér heldur nokkurs blóðs neyta í neinum af bústöðum yðar, hvorki úr fuglum eða fénaði" (3M 7.26). Ég verð að játa að öll fjölskyldan borðaði blóðmör í gær, hefur gert það áður og mun halda áfram að gera það í framtíðinni. Það sem bíður okkar er því eftirfarandi: "Hver sá, er nokkurs blóðs neytir, hann skal upprættur verða úr þjóð sinni" (3M 7.27).
Af hverju eru blóðmörsætur velkomnar í íslensku þjóðkirkjuna á meðan samkynhneigðir upplifa sig sem annars flokks þegna? Einhverjir geta kannski líka svarað mér hvers vegna prestar raka sig. Eða stendur ekki í Biblíunni þar sem fjallað er um heilagleika presta eftirfarandi: "Eigi skulu þeir gjöra skalla á höfði sér, eigi raka skeggrönd sína, né heldur skera skurði í hold sitt" (3M 21.5).
Er kannski hugsanlegt að Biblían sé notuð til að réttlæta hommafóbíu og fordóma? Menn virðast allavega hafa talsvert frelsi til að velja og hafna og taka það sem hentar best. Ég man allavega ekki eftir að rætt hafi verið mikið um eftirfarandi í þeim Guðsþjónustum sem ég hef hlýtt á: "Og ef prestsdóttir vanhelgar sig með saurlifnaði, þá vanhelgar hún föður sinn. Hana skal brenna á eldi" (3M 21.9).
kv Kalli