Evróvision

Fjölskyldan horfði á Evróvision í tölvunni í kvöld. Lagið hans Hallgríms komst því miður ekki áfram þótt það hafi verið mjög frambærilegt. Sum lög eru einfaldlega þannig að það tekur tíma að kunna að meta þau en vinna á með hverri hlustun; mér finnst það sérstaklega eiga við um lágstemmd og róleg lög. Það er því ekki að ástæðulausu að ekki megi flytja lögin opinberlega fyrir keppnina, þetta tryggir að allir sitji við sama borð.
Það er síðan höfunda að sjá til þess að lögin fari ekki í umferð áður en keppnin hefst - slíkt er einfaldlega þjófstart. Ef lag er í umferð á netinum löngu áður en keppnin hefst hefur höfundur lagsins einfaldlega brugðist. Hvort það gerðist viljandi eða óvart skiptir ekki máli. Þetta er einfaldlega eitt af þeim málum þar sem það skiptir ekki höfuðmáli hvort um ásetning var að ræða eða ekki. Höfundurinn er annað hvort kærulaus eða ætlaði sér að brjóta reglurnar. Hvort sem um er að ræða á að dæma lagið úr keppninni tafarlaust. Það þarf enga fundi til að finna það út. Það þarf hins vegar maraþonfundi til að komast að þeirri niðurstöðu að ekki eigi að fara eftir reglum sem settar voru fyrir keppnina.
Sú niðurstaða að leyfa Silvíu að halda áfram er illskiljanleg og setur slæmt fordæmi. Hverslags lausn er það að hleypa einu lagi í viðbót inn í úrslitakeppnina. Þetta er eins og það sé viðunandi lausn að leyfa manni, sem dæma á úr keppni í 100m hlaupi fyrir þjófstart, að halda áfram en bæta bara við einu sæti í úrslitahlaupinu í staðinn; búa bara til níundu brautina takk fyrir. Þetta er nú meiri vitleysan. Kv Kalli