Frú nefmælt bloggar

Er bæði búin að jafna mig á flensu, kvefi og blogstipation. Var heima í dag, kunni ekki við að smita sjúklingana mína af einhverri veiru sem hefur herjað á mig síðustu daga. Náði þó í Óðinn í skólann og hlustaði á sellótíma sem hann fór í. Kennarinn var bara ánægður með árangurinn, sérstaklega eftir að ég greiddi henni fyrir tímana, verð að segja að Óðinn fékk bara mjög mikið hrós.

Ein mamman var ægilega spennt fyrir utan skólann, hnippti í mig og sagði stolt frá því að drengirnir hennar (hún á 6 ára tvíbura) hefðu verið samþykktir í einhvern fínan einkaskóla næsta vetur þar sem hvert ár kostar eina milljón ISK á haus. Þeir þurftu að sögn að taka inntökupróf inn í herlegheitin sem þeir náðu með glans. Ég samgladdist henni mjög, sérstaklega þegar hún sagði mér hversu fínir skólabúningarnir væru, stuttbuxur allan ársins hring, líka á veturna!! Frábært. Mér hefði nú dottið í hug að þeir ættu að hafa efni á því að sauma heilar skálmar á buxurnar fyrir alla peningana sem þeir þiggja í skólagjöld en svo er ekki.
Við Kalli vorum að velta því fyrir okkur hvað væri keypt fyrir peningana, höldum að lestrar, skriftar og reiknistímarnir séu bara svipaðir og í ríkisskólunum en sennilega sé fólk að borga fyrir framtíðarvini barnanna, þ.e. að þeir séu af fólki af góðum efnum þannig að félagslegi statusinn verði "fínni".

Mamman bauð mér og Óðni formlega í sunnudagshádegverðarboð 26. mars næstkomandi, við erum alveg ægispennt he he......góðar stundir í bili!!
Ásta