Þar sem frá var horfið...

Eftir rúmlega vikulyfjameðferð við blogstipation er loksins einhvern árangur að sjá. Í millitíðinni hef ég unnið að kafla 34 í ævisögunni minni sem ber heitið "baráttan við geðveikina" og verður sennilega einnig heitið á öðru bindi af tíu.
Það helsta sem hefur gerst frá síðasta pistli
1. Eiginkona þingmanns frjálslyndra demókrata, sem nýlega varð uppvís að því að hafa keypt þjónustu brasílískra vændiskarla ótal sinnum og fannst sérstaklega stimmúlerandi að hafa þá íklædda fótboltabúningi uppi á rúmi, hefur fyrirgefið honum þennan "skort á dómgreind" eins og hann kaus sjálfur að kalla það. Það iljaði manni um hjartarætur að sjá þau hjónakornin skælbrosandi þar sem þau sátu saman fyrir blaðaljósmyndara eftir að sættir tókust.
2. Glæpalýður stal svo miklum peningum úr peningageymslu í Kent að þeir þurftu að skilja 15 miljón pund eftir á víðavangi og komust einungis undan með 35 milljón pund.
3. David Seaman, fyrrv. markvörður Arsenal datt út úr þætti þar sem Celebrity taka þátt í parakeppni í listdansi á skautum ásamt professional fólki. Eftirsjá að David, hann tók sig svo vel út í skautagallanum sminkaður í framan.
4. Þátttakendur í Celebrity Fit Club halda áfram að tapa þingd. Þáttakandanum sem fór í magaminnkun fyrir keppnina virðist hafa verið fyrirgefið meint svindl.
5. Þorrablót Íslendingafélagsins fór fram um helgina og tókst vel. Við Ásta fórum ekki, förum bara næst.
6. Fyrirhugað er að setja upp Fimbles (hræðilegar prjónaðar fígúrur fyrir krakka, svipað og stubbarnir) í leikhúsinu í Bromley. Ef ekki er leitað við innganginn færist ég nær langþráðum draumi um að hella yfir þær olíu og kveikja í.
kv Kalli