Sólblómamont

Óðinn kom með bréf frá kennaranum úr skólanum fyrir helgina. Þetta var örvæntingarfull neyðaróp örvinglaðrar miðaldra konu. Bekkurinn er að taka þátt í æsispennandi sólblómasamkeppni. Krakkarnir höfðu gróðursett sólblómafræ í vor og sá bekkur vinnur sem er með stærsta sólblómið í lok skólaársins. Það fylgdi sögunni að sólblóm bekkjarins var ekki búið að ná 2cm hæð, en sumir aðrir bekkir höfðu nú þegar ræktað 12cm blóm. Óskað var eftir sjálfboðaliðum til að reyna að rækta stærra blóm fyrir bekkinn.
Ég verð að segja að ég brosti í kampinn þegar ég las bréfið. Við gróðursettum líka sólblómafræ í vor sem nú hefur náð 55(segi og skrifa fimmtíuogfimm)cm. Þetta eru greinilega algjörir amatörar þarna í skólanum sem ekki hafa komið nálægt hard-core sólblómarækt. Ég og Óðinn erum því búnir að skrá okkur í keppnina og ef allt gengur að óskum er sigurinn bara formsatriði. Áfram Ísland!
kv Kalli